Ish-gardiani në burgun e Prishtinës e të Lipjanit, Boban Toniq është deklaruar se është i pafajshëm për akuzat për krime lufte gjatë periudhës së ushtrimit të detyrës së tij.

Toniq deklaroi pafajësinë e tij pas leximit të aktakuzës nga prokurori special, Atdhe Dema, teksa gjykatësi i rastit, Rrahaman Beqiri njoftoi të akuzuarin dhe mbrojtjen e tij për kundërshtimin e provave dhe kërkesën për hudhje të aktakuzës në afat prej 20 ditësh.

Toniq i njohur me nofkën “Bellko”, sipas aktakuzës së Prokurorisë Speciale të ngritur më 31 dhjetor 2025, akuzohet për maltretim të të burgosurve shqiptarë bashkë me kolegët e tij gardianë serb.

Aktakuza thotë se të burgosurit ishin torturuar në mënyrë çnjerëzore me mjete të ndryshme si shkop gome, shufra metalike, shqelma e grushte deri në alivanosje.

Sipas viktimave, nga ky maltretim ata kanë pësuar dhimbje të mëdha trupore, dhunë psikike deri në ankth e frikë dhe i kanë lënë pa ngrënë me ditë të tëra.